وسط البلد

اعتقد انى الحمدلله متأخرتش فى الكتابه المرة دى والمرة دى انا عايزة اتكلم عن حاجه واحدة بس وهى وسط البلد انا مهما اتكلمت انا مش حقدر اوصف انا بحب المنطقة دى أد ايه بجد انا كل ما بكون مضايقه او مخنوقه بحب انزل امشى فى وسط البلد بحب امشى وسط المحلات ووسط الناس وحتلاقى فى وسط البلد كل الطبقات وعلى رأي اغنيه وسط البلد لفريق وسط البلد شوفنا المسافر والمهاجر والقريب والبعيد والمبدع واللى فاكر انه مبدع وجلابيه وبدله وجينز وحريم اجنبيه وخراتيه وفنانين و فلاحين وباشاوات وشحاتين ,........
فعلا انت انزل وسط البلد حتلاقى كل دول ماشين جانبك وياسلام بقى ساعات وانا ماشيه تخبط فى ودنى كلمه اتنين بيقولها فجأة بحس انى وسطهم يعنى مرة اسمع واحده بتقول لمامتها خلاص بقى انا حجيب البلوزة اللى شوفتها دى وخلاص وساعتها بكون نفسى اعرف ياترى ايه هى البلوزة دى وعامله ازاى ولا واحده تانيه بتقول لصاحبتها مش عايز يرد عليا وبتكون مضايقه اوى ولا اتنين ماشين ماسكين ايدين بعض وماشين يحبه فى بعض اهو يومينهم وعلى راى الفنان الراحل عمرو دياب (كلهم بيقوله كده فى الاول) ويا سلام على قهاوى وسط البلد الندوه الثقافية ولا التكعيبة وشهان والبستان اجمل قهاوى وسط البلد والناس اللى عليها انا بس بكون مضايقه من البنات اللى بتكون قاعده تشرب شيشة يعنى هى قهوة يعنى شيشة وايه الشيشة ليه انا عارفه انها حرية شخصية بس ليه على العموم ماليش دعوة ده مش حيأثر فى جمال وسط البلد وحبى ليها اما بالنسبه للمواضيع اللى حصلت فى وسط البلد اللى خلت ناس كتير بيخافوا منها وهو موضوع التحرش الجنسى ده
انا مش حتكلم فيه علشان دول شويه ناس فاضيه ومش متربيين واعتقد ان ناس كتير اتكلموا فيه بس انا نفسى اقول لكل ولد اعتبر بجد دى امك او اختك او مراتك وعلى فكرة المشكله دلوقتى مش فى الشباب دى فى الاطفال يعنى بصراحه انا اكتر سن بخاف منه فى الشارع الاطفال من سن 10 لحد 15 سنه دول بيكونوا مش فاهمين حاجه هما بيتقلدوا وخلاص ولو حد كلمهم الناس اللى بترد بالامبالاه دول عيال عيال! يبقى لازم يتربوا المهم انا مش عايزة اخرج من موضوع وسط البلد بجد انا بحب وسط البلد دى اوى ومش عارفه ايه اهميه الموضوع ده بس انا عايزة اتكلم عن وسط البلد وخلاص وحفضل احب وسط البلد شارع شارع من اول شارع طلعت حرب وقصر النيل وشامبليون وشارع فؤاد ومحمد فريد و............................ وكل الشوارع دى بحبك يا وسط البلد.

نيو لوك

وانا لسة فى حاله الزهق والملل والكأبه اللى انا فيها مكنتش لاقيه حاجه اعملها قولت اعمل نيو لوك للمدونه وخلاص يمكن لما اعمل كده واجددها الناس نفسها تتفتح وتدخل تقرأ اى حاجه فيها بس مش عارفه هل ده حيحصل؟ بس حتى لو محدش دخل وشاركنى فى المدونه دى كفايه انى لما بكتب برتاح وبحس انى اتكلمت وخلاص حتى لو كنت بكلم نفسى بس على فكرة انا قررت انى مع هذا النيو لوك الجديد للمدونه ان انا كمان حنشط شوية وابدأ اكتب بجد وحاخد الموضوع بجدية شوية يعنى مش بس لما اتزنق اكتب لا حاحاول انى اكتب باستمرار ومش حتأخر تانى فى الكتابة