مسير ولا مخير

بجد انا عايزة اسأل كل واحد فينا السؤال ده انت مسير ولا مخير؟ الموضوع ده كتير من الفلاسفة اتناقشوا فيه, فى اللي قال ان الانسان مسير واللي قال انه مخير بس انا من وجهه نظرى البسيطة شايفه ان الانسان مسير يعنى مجبر على كل اللى بيعملوا يعنى الناس اللي بتقول لا انت مخير انت تقدر تقول اه انا ممكن اعمل كده او لأ مش حعمل كده بس فى الحقيقة انت بعد ما حتاخد القرار اكيد هو ده اللى مكتوبلك علشان كده انا قررت انى كل اللي حيحصلى حعتبره مقدر ومكتوب وعلى رأى المثل

المكتوب على الجبين لازم تشوفه العين
وحعتبر فعلا انى مجبرة على كل اللي بعمله فى حياتي وكل اللي حصلي يعنى لما سقط فى الكليه انا كنت مجبرة او مسيرة ان ده اللى يحصلى ربنا عايز كده, ولما سيبت الشغل اللى انا كنت فرحانه بيه وكنت شايفه انه احسن حاجه حصلتلى برضه نصيب وانى كنت مجبرة انى اسيبه وحاجات كتير فى حياتى وقرارات كتير اخدتها وبندم عليها ومتهيألى كده الواحد ممكن يرتاح فى حياته اللى هى كلها كام يوم وتخلص ولا انتم ايه رأيكم؟
ها انت مسير ولا مخير؟

عايزة اكتب

مش عارفه ليه انا دلوقتى عايزة اكتب وفى نفس الوقت انا مش عارفه حكتب ايه
انا بقالى كتير اصلا مدخلتش على المدونه وده كان لاسباب كتير منها ان تقريبا محدش بييدخلها ولا بيقرها غير عدد قليل اوى اقل يمكن من صوابع ايدى وساعات كمان انا اللى بكون قيللهم انه يدخلوا يقروا وكمان طبعا اكتشافى للفيس بووك اللى اخد تقريبا كل وقتى على النت لكن دلوقتى معرفش ليه انا عايزة اكتب اوى عايزة اقول اى حاجه بس ليه مش عارف!ممكن يكون علشان الايام دى مخنوقة رغم انها اول ايام السنه الجديده والمفروض انى استقبلها بسعاده لكن للاسف بستقبلها بكأبه فظيعه لدرجه ان كل صحابى دلوقتى شيفنى انى بقيت كئيبة ومحبطه بعد ما كنت على طول مبسوطه ومرحه ومرتاح فى كل حاجه اعملها لدرجه ان واحد من صحابى كان بيقولى انتى لما بتكون مبسوطة بتعرفى تخلى كل اللى حوليكى كمان مبسوطين بس انا دلوقتى مش كده للاسف بقيت على طول كئيبة ونفسى اعرف السبب ياترى ايه السبب؟؟؟؟؟؟؟؟؟؟؟؟ لا انا ممكن اكون عارفه السبب بس انا اللى بهرب منه وده اللى مضايقنى اكتر الهروب صفه جديده اكتسابتها مكنتش موجوده فيا انا عمرى ماكنت بهرب من اى موقف اكون فيه كنت دايما بواجه لو حيحصل ايه بس دلوقتى مش عارفه ليه بيحصل كده؟ بجد لو حد دخل وقرأ الموضوع ده يقولى رأيه ويقولى اعمل ايه؟؟