انا رجعت تانى

طبعا انا عارفه ان انا بقالى كتير اوى مش بكتب داخلين اهوه على تلات شهور مع ان شهر يوليه واغسطس كانوا مليانين احداث وحاجات كتير بجد كان نفسى اكتب عليها بس للاسف مكنش عندى وقت كان الشغل تقريبا واخد كل وقتى وحاجات تانيه كده المهم ان انا حرجع تانى واكتب من أول وجديد وحكتب عن حاجات كتير وممكن لو تسمحولى ارجع شويه فلاش باك ونتكلم على الحاجات اللى حصلت فى شهر يوليه واغسطس اينعم حطول عليكوا بس حاحاول اجيب المختصر المفيد اول الحاجات اللى حتكلم عليها ان انا الحمدلله نجحت والسنه دى ليسانس مع انى بقعد افكر مع نفسى مش كان زمانى خلصت بس الحمدلله على كل حال وبقول لكل صحابى اللى خلصوا مبروك وكفارة!!! دى متهيألى كانت حاجه مهمه اوى فى الشهر ده واما فى شهر اغسطس فكان فيه حاجه بنسبالى تعتبر حاجه مقدسه هو مهرجان القلعه للموسيقى والغناء ده مهرجان بتعملوا الاوبرا بقاله حوالى عشرين سنه لكن وقف سنتين لظروف خاصه لكن رجع تانى وطبعا انا كنت فى قمه السعاده ان مهرجان القلعه رجع تانى وطبعا روحت لان المهرجان ده مليان ذكريات عزيزة عليا اوى بس للاسف كان افشل سنه شوفته فيه من سوء كل حاجه فرق وتنظيم وكل حاجه بجد زعلت عليه اوى ياخساره يا مهرجان القلعه وطبعا كان يوليه واغسطس شهور الصيف يعنى الاخوة العرب اللى كانوا مليين البلد وطبعا اكيد كتير منكوا حسوا احساس ان البلد بتكون مش بتاعتنا خالص فى كل حاجه تيجى توقف تاكسى يسيبك ويروح الاخ العربى تيجى تدخل محل البايعين يسبوك لوحدك ويوفقوا مع الاخت الخليجيه بجد كانت حاجه وحتفضل حاجه وحشه اوى وبتخالينا نكرهم ونكره اليوم اللى بيجو فى البلد على العموم كل سنه وانتم طيبين والحمدلله الشهرين عدوا على خير !!!! وعايزة بقى اقول دلوقتى كل سنه وانتم طيبين ورمضان كريم طبعا اكيد حيكون فى موضوع خاص جدا عن رمضان طبعا بجماله وحلاوته وحفلاته استنونى فى موضوع رمضان وكل سنه وانتم طيبين ورمضان كريم......

سلام يا يونيه

شهر يونيه ده حصل فيه حاجات كتيييييييير اوى بالنسبه ليا كان فيه حاجات حلوة وحاجات وحشة اول الحاجات الحلوة دى كان فى يوم 6/6 ده كان اخر يوم امتحانات وطبعا كل الناس اللى بتمتحن بتكون عارفه اد ايه الواحد بيستنى اليوم ده بفارغ الصبر علشان يخلص من كابوس الامتحانات ده وكمان فى اليوم ده انا كنت مستنيه حدث سعيد (مش انا) اختى المفروض تولد اليوم ده وفعلا ولدت وجابت بنوتة زى القمر اسمها (سلمى) جميلة اوى ان شاء الله حوريكوا صورها قريب حمدلله على السلامه يانهى وربنا يخليكى لسلمى وهاجر ونورتى يا سلمى
ومن الحاجات الحلوة برضه كان عيد ميلا ليلى بنت اختى التانية وليلى خلاص بقى عندها 4 سنين يااااااا ده الزمن بيجرى اوى انا فاكرة يوم ولادة ليلى انا كان عندى امتحانات ثانويه عامه وفاكرة اليوم ده كويس اوى كانه كان امبارح مثلا مش من اربعه سنين
وعلى فكرة ليلى عيد ميلادها مع عيد الموسيقى 21/6 كل سنة وانتى طيبة يا لولا وعقبال 100 سنة
ومن بقى الحاجات الوحشة بس الحمدلله عدت على خير انى كنت فى شهر يونية ممكن اخسر واحد صاحبى عزيز عليا اوى بس خلافات عبيطة بس الحمدلله يونيه مخلصش غير لما تصلحنا وبقينا احسن من الاول وعايزة اقول لصاحبى ده بجد انا اسفة اوى وانه مايزعلش منى لو قولتله كلام رخم او حاجه لانى انا فعلا كنت الغلطانة
وبرضه فى شهر يونيه انا اتعرفت على ناس جديده وبقوا اصدقاء ليا وعايزة اقولهم انا اتشرفت بمعرفتكم
وبجد شهر يونيه ده كان طويل اوى ومليان بحاجات كتييييير اوى وغريبه اوى بس الحمدلله عدى على خير........

أين رجال المحروسة...؟

انا مش حكتب حاجات كتير انا بس من كام يوم دخلت على مدونه وكانت صاحبتها كاتبه الموضوع ده أين رجال المحروسة؟ بجد الموضوع شدنى اوى ولازم كل الناس تدخل تقرأ الموضوع ده المدونه بعنوان احلى كلام
www.a7lakalam.blogspot.com

ليه؟

النهاردة انا مش حتكلم فى حاجات كتير لا انا حسأل أسئله كتير وكلها ليه؟ ليه مش بنحس بقيمه الحاجه غير لما تضيع مننا ؟ ليه مش بنهتم بالناس اللى بيهتموا بينا؟ فحين اننا بنهتم بالناس اللى حتى مش معبرنا ؟ ليه بنحب نقرب من البعاد عننا ؟ ليه بنبعد عن القريبين مننا؟ ليه مش بنحب اللى بيحبنا ؟ ونحب اللى مش بيحبنا؟ ليه مش بنحاول دايما نفهم الحقيقة؟ لا بنكون عايزين دايما نصدق الكدب؟وليه احنا اصلا مش بنحب نقول الحقيقة؟ وليه دايما بنكدب على نفسنا؟ليه بنعمل كده؟وليه حنفضل نعمل كده؟وليه انا بقول الكلام ده دلوقتى؟ وليه عملت كده؟؟؟؟؟؟؟؟؟؟؟؟؟؟؟

عيد الموسيقى

بجد طول عمرى بحب فرنسا والفرنساويين بجد الناس دول رايقيين اوى بيهتموا بكل حاجه واهم حاجه عندهم الثقافة بجد جميل اوى انهم يهتموا بالموسيقى لدرجه انهم يعملو عيد للموسيقى وده يوم 21 يونيو من كل سنه لازم يحتفلوا فى جميع انحاء العالم بعيد الموسيقى فعلا ففى فرنسا نفسها بيحتفلوا بعيد الموسيقى فى الشارع بيعملوا حفلات للناس فى الشارع والموضوع بدأ يبقى عالمى ففعلا بدأ المركز الثقافى الفرنسى فى مصر انه يحتفل بعيد الموسيقى هنا فى مصر وفعلا ده كان من فترة بس مش فاكره من امتى بالظبط بس انا عن نفسى اول عيد موسيقى حضرته كان تقريبا على ما اتذكر سنه 1998 تقريبا وكان حلو اوى كان فى الاوبرا بعد كده بدأ المركز يختار اماكن حلو اوى يحتفل فيه بعيد الموسيقى زى الجنينه الريادى وفى القلعه واماكن مختلفه وبدأ يتعمل اكتر من يوم بجد حاجه حلوة اوى ومثلا كمان عملوا مرة فى قصر البارون ودى كانت اول مرة اروح قصر البارون فى حياتى
بجد بيعملوا حاجات حلوة اوى بيساعدوا الفرق الشابه انها تلعب مزيكتهم قدام ناس كتييييير اوى بجد حقيقى المركز الفرنسى ده جامد اوى وبدأ الاحتفال يبقى اكتر من يوم والسنه دى هما بيحتفلوا بعيد الموسيقى 3 ايام ابتدأ من يوم 19 فى الاسكندريه وحيكون فى سعاد ماسى فى مكتبه الاسكندرية
ويوم 20 فى مصر الجديدة فى نادى الباتروناج وحيكون فى فرقة وسط البلد ويوم 21 اليوم الاصلى حيكون فى القلعه(قلعه صلاح الدين) وحيكون فى فرقه صن شين ,والدور الاول ,وسعاد ماسى ,الفرقة القومية للموسيقى الشعبي. وطبعا الدخول مجانا
بجد شكرا جدا لفرنسا والدماغ الفرنسية
تعالى بقى نشوف المصريين قرروا انهم لازم يكون ليهم موقف فى عيد الموسيقى ويحتفلوا هما كمان بيه فقررت ساقيه عبد المنعم الصاوى (لها الف شكرا)انها تحتفل بعيد الموسيقى وققرت انها تحتفل بيه فى حديقة الاورمان وفعلا حتجيب فرق جامدة : افتكاسات ,وسط البلد , بلاك تيما ,صحرا,مودو .بجد شكرا يا ساقيه انك فكرتى انك تعملى حاجه زى دى بس خالى بالك الساقيه مش بتعمل حاجه لله وللوطن لا فى تذكرة بس كتر خيرهم مش بفلوس كتير 10 جنيه بس كانك جبت هديه للموسيقى شوفت الفرق فى المصريين لازم يستغلوا الموقف باى حاجه لا زم يدفعوك فلوس فرصه طبعا علشان خاطر الموسيقى ما علينا يا جماعه الحفلات كلها حتبدا الساعة 8 للعايز يروح وكل سنه والموسيقى طيبةوعقبال مليووووووون سنة

مساء الخير

مساء الخير ايه الاخبار يا جماعة انا عارفه انى اتاخرت فى الكتابه بس اعمل ايه بقى انتوا عارفين كنت مشغوله اوى فى الامتحانات ومازلت بس على العموم عدى القليل ما باقى غير الكتير (هههههههه) بس بصراحه حصلت حاجات كتير لاقيت نفسى سيبت الامتحانات والمذاكرة وعايزة اكتب بصراحه فى حاجه انا عايزة اتكلم فيها وهى اصلا الامتحانات وحاله النسيان مش عارفه ايه السر ان فى اول ماده انا وكل صحابى كنا داخلين وبندعى ان موضوع معين يكون سؤال فى الامتحان وفعلا اول ما دخلنا لاقينا السؤال ده و بالنص زى ما احنا عايزينه وكلنا قررنا اننا نجاوب السؤال ده اول حاجه بس تحصل المشكله وننسى نص الاجابه ليه الله اعلم ! بس الحمدلله عدى على خير وباقيت الامتحانات عدت على خير وربنا يستر فى الجاى . وربنا معانا ومع كل اللى بيمتحنوا ويكفينا شر كل دكتور مفترى وظالم. تانى حاجه عايزه اتكلم فيها ان تحصل المعجزة والف حمد والف شكر ليك يارب وهى فوز الزمالك على الاهلى بجد حصلت والزمالك كسب اينعم 2/0 بس الحمدلله
طبعا الاهلويه حاولوا يبرره موقفهم ويقولوا اصل احنا كنا بنلعب بالاحتياطى واللي يقول اصل احنا خلاص معانا الدورى ومش مهم اى حاجه واللى يقول لو كان ابو تريكه بس فى الملعب كنتوا حتتبهدلوا طيب يا عم يا بتاع ابوتريكه طيب ما هو كان فى الملعب والاهلى اتغلب مع الاسماعيلى واتعادل بالعافية مع بتروجيت (طبعا مع كل احترامى لابو تريكه اللى انا بحبه اوى وكفايه ادبه وابتسامته)بس الحمد لله الزمالك كسب ومبروك يا زمالك وايوة اكده ارجع وريهم انت ايه على العموم كفايه كده النهارده واشوفكوا بعد الامتحانات سلام

يوم 4/5 يوم جامد اوى

بجد كان يوم جامد يوم الجمعه 4/5 كان فى حاجات كتير حلوة حصلت فى اليوم ده, اول الحاجات دى كان فى حفله بتحصل حوالى كل3 شهور هى(اس او اس) المهتمين بالمزيكا يعرفوا انها حفله اتعملت قبل كده 3 مرات ودى المرة الرابعه وهى حفله بتكون من الساعه 2 الظهر لحد الساعه 12 بليل فى الحديقه الصينيه فى قاعه المؤتمرات وبتكون الحفله فيها اكتر من 7 فرق موسيقيه مختلفه يعنى 3 مرات اللى فاتوا كان فيها وسط البلد وافتكاسات وفرق تانيه زى الحب والسلام والدور الاول ورساله وكروماتكس ونغم مصرى وفتحى سلامه وبلاك تيما وفرق تانيه كتيرة جامده اوى بس المرة دى مكنتش الفرق بقوه كل مرة يعنى كان فى حوالى 3 فرق بس اللى جامده بس مش ده المهم, المهم بالنسبالى انا ان اليوم ده كان جامد اوى علشان كان معايا واحد صاحبى عزيز عليا اوى وانا بحبه اوى وبجد كنت مبسوطه انه معايا وانا مش حقول هو مين المفروض هو اللى يعرف نفسه بس بجد كنت مبسوطه اوى انه كان موجود وبجد كان يوم حلو اوى اوى اوى اوى . دى حاجه من الحاجات الكتير اللى حصلت اليوم ده وكنت مبسوطه منها .
تانى حاجه بقى هى ان كان جانبينا الاستاد وكان فى ماتش للزمالك بس مكنتش عارفه الزمالك ومين يعنى حتفرق ايه كده كده الزمالك مغلوب او بالكتير اوى متعادل بس كنت كل شويه اسمع ههها ههاههاها وصوت ناس بتشجع اما جول دخل او جول ضاع قولت عادى ده الزمالك بس بجد كانت المفاجاه الكبرى هى ان الزمالك كسب 9/0 ليه هو بيلاعب نفسه ولا ايه بس بجد انبسطت اوى اوى اوى علشان انا زملكويه اوى وربنا يهديك يا زمالك يااااااااااااااااااارب.

انا مصدومة

انا مصدومه بجد! النهارده روحت كليتى علشان اشوف ايه الاخبار والامتحانات امتى وايه نظام الجدول والحاجات دى المهم نزلت بدرى قولت علشان اجيب الجدول واشترى الورق اللى حذاكر منه وانظم الموضوع ده خلاص فاضل على الامتحانات يعنى الطبيعى شهر او اقل كام يوم روحت لقيت الجدول لسه متعلقش قولت خير يبقى لسه بدرى على الامتحان يعنى شهر زى الطبيعى, بس روحت جيبت الورق والمراجعات ورجعت على الكلية لقيت الجدول متعلق قولت كويس علشان الواحد بقى يعرف الامتحانات امتى ويظبط بقى لكن هنا لاقيت ( الصدمة الكبيرة ) يا نهار ................. الامتحانات يوم 13/5 نعم بجد ولا هزار يعنى اقل من اسبوعين ازاى والمصيبه ان عندى 8 مواد ومابين كل ماده والتانيه يومين بس يعنى بجد ربنا يستر علينا بجد انا مش عارفه الناس دى بتفكر ازاى طيب ليه اتاخروا فى نزول الجدول والغريب ان باقى الكليات كانت عارفه جدولها من اقبلينا بفترة وامتحانهم بعدينا بكتير اشمعنا احناعلى العموم بجد ربنا يستروشكرا لادارة الكلية......

زعلانه اوى

انا النهارده عايزة اتكلم فى حاجات كتيرة ومختلفه اول حاجه بجد انك لما فى مده قصيرة تعرف ناس وتحس انهم بقوا صحابك اوى بالرغم من انهم مش من بلدك ولا بيتكلموا لغتك وده حصل معايا انا من حوالى 3 اسابيع اتعرفت فى شغلى على مجموعه من الموسيقين الفرنسيين كانوا جايين يعملوا ورشه عمل مع موسيقيين مصريين فى المركز المصرى للثقافة والفنون ( مكان) وبجد بقيت انا وبعض الاشخاص منهم صحاب اوى وخصوصا واحد اسمه aymeric)) وبجد اد ايه كان عسول اوى وعلى فكرة ممكن حد يسالنى انتى تعرفى فرنساوى لا انا معرفش بس هو اميغيك بيعرف شويه انجليزى وده الغريب اننا بنتكلم وممكن يكون نص الكلام مش فاهمين بعض بس فى الاخر بنفهم بعض وبجد فى 3 اسابيع دول كنت مبسوطه اوى مع صحابى دول ونفسى يرجعوا مصر تانى بس يقعدوا اكتر من كده بجد حاجه حلوة اوى انك تعرف اصدقاء من بلاد تانيه ,ياسلام بقى لو انا اللى اسافر المرة دى فى اى حته بره مصر مثلا فرنسا اولندن او تركيا طيب باكستان طيب اى حته .....يارب..... تانى حاجه انا عايزة اتكلم فيها النهارده هى ان بجد هو فى اى اعلام فى الدنيا زى اعلامنا المصرى حصل قدامى موقف غريب اوى مذيع من احدى القنوات المصرية جيه لمكان علشان يصور تقرير عن الحدث فى المكان ده المهم هو جاى ومش عارفه هو حيصور ايه جاى فاكر حاجه تانيه خالص ولما المسئول عن المكان حاول يفهموا طبيعه المكان وبيقدم ايه علشان يكون فاهم والموضوع مش يكون سطحى قال مش مهم انا ممكن اعمل حوار مع النمله واطلعه شكله يكون حلو من غير ما افهم طيب ازاى ؟ده اهم حاجه فى المذيع انه يكون مثقف وفاهم علشان فعلا يعرف يدير حوار مش شغل بقى اتعرف عليك وانت بتعمل ايه وتحب تهدى الاغنيه دى لمين بجد انا كنت واقفه مكسوفه اوى اننا لسه بنفكر بطريقه دى ونوصلها للعالم برة بالشكل ده ونعمه الاعلام تفتكروا المذيع ده خريج ايه كليه الاعلام ولا معهد البوسته فى طنطا, طيب سؤال تانى هو المعد او المخرج كانوا فين ؟فى الاخر انا زعلانه اوى علشان صحابى الفرنسويين سافروا وعلشان اعلامنا المصرى

تغيير الساعه

االنهارده صحيت من النوم وكان عندى ميعاد الساعه 2 يعنى بعد الصلاه بشويه فجات ان الميعاد اللى الساعه 2 ده حيكون3 او انا لو رحت 2 فى الميعاد على الساعه القديمه حيكون لسه الساعه 1 المهم يعنى حيحصل لخبطه والغريب مش علشان حد غير الميعاد لا علشان الساعه هى اللى اتغيرت وبجد انا لحد دلوقتى انا مش فاهمه ايه الفايده من تغير الساعه من فضلكوا يا جماعه لو حد يعرف ايه الفايده من تغيير الساعه يقولى ويفهمنى.

صباح الخير
انا اسمى نهلة ودى اول مرة فى حياتى افكر انى اكتب انا عمرى ماكتبت حاجه حتىمواضيع التعبير فى المدرسه كانت ماما هى اللى بتكتبهالى بس المرة دى انا اللى حكتب ومش حكدب عليكوا ممكن اخلى حد تانى يساعدنى بس حقولكوا ان ده مش انا ده حد تانى وبعدين انا عايزة اشكر حد مهم اوى هو اللى عرفنى على موضوع المدونات ده بس انا مش حقول اسمه دلوقتى خليها بعدين على العموم بجد انا مبسوطه اوى......