عذراً فأنا لم أحبك – دينا رضا
هذه رسالتى الأخيرة اليك... كثيراً ما تساءلت كيف ستكون رسالتى الأخيرة.. هل ستكون رسالة حب، رسالة عتاب أم رسالة وداع ، ولكن لم أتخيل ابداً أن تكون رسالتى الأخيرة هى رسالة اعتذار.نعم أعتذر ... أعتذر لأنى لم أحبك... ليس لأنى لم أحبك كما يجب أو كما أردت أنت أن أحبك ، ولكن لأنى لم أحبك مطلقاً. نعم الآن فقط اكتشفت هذه الحقيقة.. تسألنى كيف عرفت ؟ أنا الآن أدرك تماماَ أننى لم أحبك لأننى أحببته هو، أدرك حقيقة شعورى الآن مقارنة بما كنت أشعر به معك... والفارق كبير..بعد أن تركتنى تباينت بداخلى المشاعر والأحاسيس، فى البداية كان الصمت والمفاجأة... لماذا ؟ سؤال راح يلح على عقلى كثيراً ... هل فشلت فى أن أحبك كما تريد أنت ... أم أنك لم تشعر بى يوماً ... أم أنك شعرت بى ولكن تعمدت أن تتجاهلنى!قادنى هذا الشعور بعدها الى الغضب الشديد.. كيف عشت أياماً طويلة أحلم بها معك فى حين كنت أنت لا تبالى... أحلامى باليقظة والمنام.. آمال ومشاريع وطموحات تجسدت امام عينى وغرقت فيها بكل تفاصيلها فكان كل ذلك وهماً كبيراً.. بعدها كان النسيان هو ملاذى ومهربى... لم أتعمده فهو كان لا بد أن يأتى...أما الآن بعد أن عرفته هو... بعد أن تحرك بداخلى ذلك البركان الثائر المجنون من جديد... أستطيع الآن أن التمس اليك العذر... أن اسامحك ... بل أن ارسل اليك رسالة اعتذارى هذه فلم أعد ألومك... نعم عرفت انى لم أحبك.. هل تعرف لماذا؟لم أحبك لأنى كنت أراك شيئاً عظيماً وكبيراً ومبهراً ... وأمامك شعرت بضآلة نفسى... تصورت أن هذا هو قمة ما أطمح اليه... وحاولت أن أعبر اليك بكل الوسائل والمحاولات لأكون جديرة بك، ولكن معه هو لم أشعر برغبة فى القتال ... لم أفكر بقواعد أو بقوانين المعادلة... لم أحسب بالزائد والناقص... لم أبنى خططاً ولم أبحث عن عوامل مساعدة لاتمام التفاعل... فقط تسلل حبه الىً وسبر أغوار نفسى ... وجدته بداخلى دون أن أسعى الى ذلك... تقبلته كما هو فهو ليس عظيماً جداً ولا مبهراً جداً بل هو فقط.... ببساطة وهدوء أحببته.لم أحبك لأنى كنت أبحث عنك فى كل مكان... فلما تصورت أنى وجدتك أغدقت عليك كل مشاعرى وآمالى المؤجلة... تركتها تنمو وتزدهر... غذيتها بكل ما ملكت روحى من رغبة واصرار... قاومت اللحظة وعاندت الموقف وأقحمتك على قلبى وعقلى. أما هو فلم أبحث عنه ... لم أشأ أن أخوض غمار التجربة من جديد وبالرغم من ذلك أصر هو دون أن يدرى على أن يغرينى باعادة المحاولة... معك أنت حاربت كى أصل اليك ففشلت... ومعه هو استسلمت لشعورى نحوه فنجحت.لم أحبك لأننى بعد فراقك تألمت... ندمت على ما كان منى نحوك... وعانيت من آثار حبى لك، ولكن معه هو أشعر بأنى لن أتألم... حتى لو تركنى ... حتى لو لم يشعر بى ويمنحنى حبه... ليس لأنى ألفت الفراق واعتدته، ولكن لأنى لم أعد أبخل بمشاعرى فهو يستحق... تألمت معك لأنى منحتك الحب واللهفة ولم أحصل على شىء... وسعدت معه لأنى منحته الحب والصدق فمنحنى السكينة وصفاء النفس

غريب يا حالى

غريب يا حالي غريب ومش مفهوم, ساعات بلاقي نفسي عايش فى وسط نجوم
غريب يا حالي غريب ومش مفهوم ,ساعات بلاقي نفسي عايش فى وسط نجوم

و كتير بكون ورق متقطع ومرمي فى كل حته
وساعات قلبى يدق يدق من غير لزووووم
وساعات قلبى يدق يدق من غير لزووووووووووم.

أيام بلاقي نفسي بضحك فى عز حزني وايام دموعي تبكي على نفسي في عز فرحي

وايام بتعدي عادي وايام عن نفسي راضي
وايام بموت قصادي من تقل شيل الهموم
من تقل شيل الهموم

------------------------------

شكر خاص لفرقة مرايا

الى صديقي

مش عارفة اقول ايه؟؟ بس حاسة انه واحشنى اوى صديقى اللى عمرى ماكنت أتخيل ان ممكن يجى علينا يوم ونكون مش مع بعض ولا بنكلم بعض كانت لما بيكون فى حاجة مضايقنى كان أول واحد بجري عليه وأحكيله

ياترى بعد ليه ولا انا اللى بعدت ولا هى مشاغل الحياة ولا هى الظروف ولا هو فعلا بقى يكرهنى ومش عايز صادقتى ولا ايه ولا ايه ولا ايه

حاجات كتير بدور فى بالى وبفتكر ايام ماكنا مع بعض واصدقاء فاكرة كل يوم فاكرة كل خروجة وفاكرة كل نصيحة قالهالى وفاكرة كل كلامه ليا بس ياترى هو نسي ؟؟؟نسي كل ده!!!! ازاى سهل ان الانسان يقول كلامه ويرجع ينسى؟؟ وفاكرة هو كان أد ايه بيكون مبسوط لما يعرف انى بحكيى للناس عليه وأقولهم ده صديقى , بجد عايزة اقوله انت واحشنى اوى ومحتجالك جنبى اوى دلوقتى

تعالى ننسى ايه حاجه وحشة حصلت مابينا ومانفتكرش غير صداقتنا البريئة الجميلة ...... انا مستنية

__________________________________________________

اهداء الى كل حد من اصدقائى اللى يحس انى بتكلم عنه

بس انا بكلم واحد معين واكيد هو عارف نفسه

سنة 2008

سنة حصلتلى فيها حاجات كتييييييييير اوى وغريبة جدا مع بدايتها ولحد الايام الاخيرة فيها وانا بشوف الحاجات دى.

2008 بدأت بدايه غريبه اوى اولها امتحانات وكنت فى حاله كأبه شديدة وكتبت ده فعلا هنا فى المدونة لكن مع تانى اسبوع فيها حسيت انها مش عايزيانى اكرها وانها بتحبنى وعايزنى احبها وحسيت انها شايللى مفاجأت كتير ومنها ان فى الاسبوع التانى ده كان بداية لقصة كان المتوقع انها تستمر وهى القصة الحلوة اللى بتكون فى حياة كل انسان وكنت فرحانة اوى بالقصة دى وبعد كده لاقيت 2008 لسه جيبالى حاجات حلوة تانى وهى انى اشتغلت فى شركة حلوة اوى وكنت مبسوطة فى الشغل جدا جدا وكمان نتيجة الترم الاول طلعت ونجحت بجد كنت حاسة ان 2008 حتكون احلى سنين حياتى.

بس مش عارفه ايه اللى حصل فى نصها تقريبا زعلت منى فى حاجه وزعلتنى معاها وماتت جدتى وزعلت اوى.

وبعد كده حصلت ظروف وسيبت الشغل اللى كنت معجبه بيه اوى وحسيت انى بدأت اخسر حاجات كتير لكن رجعت تانى تفرحنى انى نجحت واتخرجت بس مفرحتش اوى لان كان فى ناس كنت عايزة افرح معاهم بالنجاح ده بس كانوا مش موجودين وفعلا حسيت انى بقيت فاضية تمام بس رجعت وقولت لسه القصه الحلوة مستمرة ومش مهم اى حاجه تانيه لكن للاسف القصة دى خلصت بدون اى مقدمات ولا مبررات ولا حتى اسباب وكتبت ده لما قولت الدنيا فست معايا وجابت ارض وكنت داخلة حالة كآبه شديدة مع يأس فظيع بس الحمدلله قدرت اطلع من الحالة دى لان فى 2008 دخل فى حياتي برضه اصدقاء من العالم الافتراضى لكنهم بسرعة تحاولوا الى اصدقاء من العالم الحقيقى الجميل ووقفوا كلهم جنبى وفعلا اكتشفت ان احلى حاجه الصداقة الحقيقة اللى مش متوقعة من غير اى مصالح وبدءوا يشجعونى انى ارجع نهلة بتاعت زمان مع انهم مش يعرفونى زمان بس حسوا بيا اوى وفعلا فكرت فى كل كلمه حد منهم قالها ليا ورجعت نهلة بتاعت زمان اللى كلها نشاط وفرح وقررت انى انا اللى املى الفراغ اللى بقى فى حياتى ده وانى اخد كورسات وفعلا روحت قدمت ومع بدايه الكورس كان جاتلى فرصة شغل حلوة اوى وفى المجال اللى بحبه من زمان مجال التنمية الثقافية واللى كنت ممكن اخسره علشان شخص ماقدرش ده لكن دلوقتى رجعت لنفسى وشخصيتى الحقيقة اللى انا بحبها

لكن برضه 2008 واضح انها حست بتأنيب ضمير للى عملته فيا الفترة اللى فاتت واللغبطة دى وهى تقريبا كدة بتصالحنى وبعتالى هدية حلوة اوى كانت موجوده فى 2006 و2007 بس هى 2008 تقريب كده بتحضرهالى وعايزة تهادينى بيها فى اخرها اول حتسلمها ل 2009 ليها هى تدهالى بس على العموم انا حاسه انها مش عايزيانى ازعل منها وانا بقولها ماتزعليش منى وان خلاص مش زعلانه منك خالص بالعكس انا بحبك علشان عرفتينى حاجات كتير اولها أن الانسان لازم الاول يتأكد من الناس اللى بتحبه فعلا واللى بتعمل نفسها بتحبه ومن الاصدقاء اللى بجد وان الانسان مايحاولش مهما حصل ان يغير نفسه علشان حد لو هو مش مقتنع بالتغيير ده وبجد عايزة اشكر الناس اللى دخلوا حياتي فجأه فى 2008 وناس اللى خرجوا منها حتى لو حخرجوا متأخر او بعد مده بس تمام انهم خرجوا مستمروش اكتر من كده

واهلا 2009 وياترى ايه مفاجأتك انتى كمان؟؟؟

بانوا ايوة بانوا

بانوا بانوا على اصلكوا بانوا

والساهى يبطل سهيانوا

ولا غنى ولا سيط دول جنس غويط

وكتابنا يبان من عنوانه أيوا بانوا

جربنا الحلو المتعايق أبو دم خفيف

وبقينا معاه أخوا شقايق فكرينه شريف

أتاريه مش كده على طول الخط

الطبع الردى من جواه نط

خلاص بقى مهما اتشال واتحط مافيش دمعه حزن عشانه

بانوا ايوة بانوا

وعرفنا سيد الرجاله عرفنا عين الاعيان

من بره شهامه واصاله تشوفه تقول اعظم انسان

انما من جوا يا عينى عليه بياع ويبيع حتى والديه

واهو ده اللى اتعلمنا على اديه القهر وقوة غليانه ايوا بانوا

الدنيا فست معايا وجابت ارض

طبعا كالعادة تقريبا مش بفتح المدونه دى غير لما اكون مزنوقه وكل مرة اقول انى حكون متابعه ومهتمه واكتب بس للاسف مش بعمل كده ومش بكتب هنا غير لما بكون مضايقه والمرة دى انا مضايقه اوى وعلى فكرة انا طول الفترة الفاتت دى بجد كنت عايزة اكتب عن مواضيع كتير مضايقنى اوى بس قولت دى مش مضايقنى انا بس دى مضايقه كل الناس يعنى اكيد غيرى كتب عليها من زمان

زى الاسعار وزى قانون المرور وزى تغيير اتجاهات الشوارع وزى الحريقه اللى مش عارفين يطفوها كل الحاجات دى مضايقنى اوى بس مش مهم اهو الواحد تأقلم بقى وامره لله روبنا يتولنا برحمته

انا بقى النهارده عايزة اكتب ان الدنيا فست معايا انا شخصيا وجابت ارض فى كل حاجه اه نسيت اقول انى اتخرجت وبقى معايا ليسانس اداب ودى مش حاجه كويسه بالعكس دى من اهم الحاجات اللى جابت معايا ارض اوى تانى الاسباب دى انا قبل ماتخرج جالى شغل حلو جدا وكنت مبسوطة فيه جدا جدا وللاسف هو كمان جاب ارض وبدون اى مقدمات فجأه لاقيتنى اقعدة فى بيتنا قولت برضه مش مهم المهم ان فى قصه حلو فى حياتى وفى شخص معايا هو اللى بيساعدنى وهو اللى حيصبرنى على كل اللى الدنيا بتعملوا معايا حتسألونى الشخص ده راح فين حقولكم معرفش انا لو اعرف ارتاح وياترى هو كان وهم من الاول ولا هو فعلا كان موجوده ولحد دلوقتى انا بدور عليه هو كان بجد وحقيقى ولا كان وهم وخيال قولت خلاص اخلينى مع اصحابى واكيد حيخرجونى من اللى انا فيه للاسف كله بقى مشغول بحياته ومستقبله بس برضه منكرش ان فى بعض الاشخاص والاصدقاء اللى واقفين جانبى بس خايفه هما كمان يجيى عليهم اليوم ويبقوا عايزين يبعدو

بجد مش عارفه هى الدنيا عامله معايا كده ليه

بس برجع واقول كويس انها فست ومفرقعتش لانها لو فرقعت اكيد مش حيبقى فى حل لكن هى فست بس يعنى ممكن بمنقاخ تتنفخ تانى وترجع كل حاجه زى ماكانت بس تفتكروا حلاقى المنفاخ ده؟؟؟؟؟

وسط البلد

اعتقد انى الحمدلله متأخرتش فى الكتابه المرة دى والمرة دى انا عايزة اتكلم عن حاجه واحدة بس وهى وسط البلد انا مهما اتكلمت انا مش حقدر اوصف انا بحب المنطقة دى أد ايه بجد انا كل ما بكون مضايقه او مخنوقه بحب انزل امشى فى وسط البلد بحب امشى وسط المحلات ووسط الناس وحتلاقى فى وسط البلد كل الطبقات وعلى رأي اغنيه وسط البلد لفريق وسط البلد شوفنا المسافر والمهاجر والقريب والبعيد والمبدع واللى فاكر انه مبدع وجلابيه وبدله وجينز وحريم اجنبيه وخراتيه وفنانين و فلاحين وباشاوات وشحاتين ,........
فعلا انت انزل وسط البلد حتلاقى كل دول ماشين جانبك وياسلام بقى ساعات وانا ماشيه تخبط فى ودنى كلمه اتنين بيقولها فجأة بحس انى وسطهم يعنى مرة اسمع واحده بتقول لمامتها خلاص بقى انا حجيب البلوزة اللى شوفتها دى وخلاص وساعتها بكون نفسى اعرف ياترى ايه هى البلوزة دى وعامله ازاى ولا واحده تانيه بتقول لصاحبتها مش عايز يرد عليا وبتكون مضايقه اوى ولا اتنين ماشين ماسكين ايدين بعض وماشين يحبه فى بعض اهو يومينهم وعلى راى الفنان الراحل عمرو دياب (كلهم بيقوله كده فى الاول) ويا سلام على قهاوى وسط البلد الندوه الثقافية ولا التكعيبة وشهان والبستان اجمل قهاوى وسط البلد والناس اللى عليها انا بس بكون مضايقه من البنات اللى بتكون قاعده تشرب شيشة يعنى هى قهوة يعنى شيشة وايه الشيشة ليه انا عارفه انها حرية شخصية بس ليه على العموم ماليش دعوة ده مش حيأثر فى جمال وسط البلد وحبى ليها اما بالنسبه للمواضيع اللى حصلت فى وسط البلد اللى خلت ناس كتير بيخافوا منها وهو موضوع التحرش الجنسى ده
انا مش حتكلم فيه علشان دول شويه ناس فاضيه ومش متربيين واعتقد ان ناس كتير اتكلموا فيه بس انا نفسى اقول لكل ولد اعتبر بجد دى امك او اختك او مراتك وعلى فكرة المشكله دلوقتى مش فى الشباب دى فى الاطفال يعنى بصراحه انا اكتر سن بخاف منه فى الشارع الاطفال من سن 10 لحد 15 سنه دول بيكونوا مش فاهمين حاجه هما بيتقلدوا وخلاص ولو حد كلمهم الناس اللى بترد بالامبالاه دول عيال عيال! يبقى لازم يتربوا المهم انا مش عايزة اخرج من موضوع وسط البلد بجد انا بحب وسط البلد دى اوى ومش عارفه ايه اهميه الموضوع ده بس انا عايزة اتكلم عن وسط البلد وخلاص وحفضل احب وسط البلد شارع شارع من اول شارع طلعت حرب وقصر النيل وشامبليون وشارع فؤاد ومحمد فريد و............................ وكل الشوارع دى بحبك يا وسط البلد.